برچسب‌ها: کتاب, آنا توپراغیم, ج 1

تاريخ : بیست و ششم تیر 1392 | 14:5 | نویسنده : مهدی همت زاده(ائلدار) | [ ]

بو غزل حورمتلی دوستوم و شاعر قارداشیم آقای دکتر پیمان یارمحمدزاده جنابلارینا عاید دیر  

آواجیق وصفی  

هر کس ایستر گوره جنت باغی نین منظره سین

یای زمانیندا دولانسین آواجیق منطقه سین

اللها شکر ایده جکدیر بیلیرم گورسه اگر

صوفعلی گمرکینی یاکی کریمخان دره سین

قارلی داغلاره باخان قدرت معماری گورَر

هاموسینداندا وقارلی قوجامان قورد تپه سین

سولاریندان نه دییم وصفینه عاجزدی دیلیم

زی سویون یا کی عرب دیزجی نین شرشره سین

گوز دولاندیقجا چمن لیقدی یاشیل کوینگیلن

سویرم مال داوارین آت قوزو اوغلاخ هوسین

واردی بیر گمرکی امَا قاپوسین باغلادیلار

اولاریکه اشیدیب یاخشی بیلیر همهمه سین

ملَتیندن نه دییم قلبلری آینه دی

آذری خالقینین الله بینوب عایله سین

شهریمیز شهر شهیداندی اونون خاطرینه

ساخلاریق ان اوجا یرده اولارین خاطره سین

اردبیل اورمیه تبریز بیزه هیچ فرق ایلمز

   اصل اودور حس ایلیاق آذربایجان نفسین                   

  وطنیم شانلی دیاریم سنه (پیمان )ویریرم

تا جانیم وار یاشادام بایراغوین منظره سین  

شاعر : دکتر پیمان یارمحمدزاده

آواجیق - منطقه سرسبز و خوش آب و هوا در جوار ماکو و از نظر تقسیمات کشوری از توابع شهرستان چالدران  

گمرک صوفعلی - گمرکی تاریخی در این منطقه که در روستای صوفعلی واقع است  

زی سو نام چشمه ای که در روستای طهماسب کندی قرار دارد و آب معدنی این چشمه برای دفع سنگ کلیه بسیار نافع است  

قورد تپه سی نام کوهی واقع در شهر آواجیق  

عرب دیزجی - روستایی در منطقه آواجیق  

شُرشُر - نام آبشاری واقع در روستای عرب دیزج  

کریمخان دره سی - درَه ای سرسبز و دیدنی در آواجیق   

 

 



تاريخ : نهم آذر 1393 | 21:5 | نویسنده : مهدی همت زاده(ائلدار) | [ ]

منبع : وبلاگ ادبی استاد بزرگوار اصغری


شعری یاز کی شعرا    ایچره  گوزل آد  اولاجاق
اهل ذوقه نه  گوزل   انس وگوزل    داد اولاجاق

 

خیمه ی شعره نه یل  رخنه نه سیل  لطمه ویرار

تا جهــان   وار  او گوزل     خیمه ده  آباد اولاجاق

 

هر گوزل کی بو جهان دا   گورونوب  یا  گورونور

اونلارین وصفی ده اشعاریله خوش     یاداولاجاق

 

اولمــاسا   شاعــر شــیرین  غزلیــن    شـعـــرلری

کیم دئیر  محبــــس  غمدن      اوره ک  آزاد اولاجاق

 

یاز  گوزل شــعر عزیـــز(( مـهـدی همت زاده))

اهلینه  شـعر یتیشسه  اوره گی شاد اولاجاق

 

اوگوزل شعری که هر   بندی ده بیر گنج یاتوب

گوندریبسن بیزه احسن که  گوزل    یاد اولاجاق

 

گنه ده  یازکی  یازان      لذت شـــعری    داداجاق

اوخــویاندا  اوخودوقجـا   اولاری      شاد اولاجاق

 

بیــرده   یاز    شـعری  (( محرم بابا زاده )) آدینا

شـعروی گورسـه اوشیریـن سوزه فرهاد اولاجاق

 

اصغری وئر غزلین     رشته سین    استاد الینه

هر کیمین   ذ و قی اولا   شعرده   استاد اولاجاق


برچسب‌ها: شعری از استاد بزرگوار اصغری

تاريخ : بیست و دوم مهر 1393 | 19:26 | نویسنده : مهدی همت زاده(ائلدار) | [ ]
حورمتلی دوستلار و عزیز قلمداشلار یئنی بیر ویلاگ (معرفی اشعار و آثار استاد حامد ماکویی ) عنوانیندا آچمیشام لطفا" بو وبلاگا باش وورون و نظرلریزی یازین انشالله بئله لیکله بو بزرگوار شاعرین حقینده آرتیق بیلگی لنمیش اولاق . منت دارام سیزه. hamidmakuy.blogfa.com  - آدرس وبلاگ

 

 



تاريخ : سی و یکم شهریور 1393 | 9:41 | نویسنده : مهدی همت زاده(ائلدار) | [ ]

نه گوزل گور یاراشیر، تارزنین تار الینه

ائله بیل زولفون آلیب ، یار وفادار الینه

اوخشادقجا تئلی مضرابیله ، غملر داغیلیر

مین اورک باغلیدی بیر نقطه ده انگار الینه

بیزیم آذر ائلی نین به بهی ماشاللاهی وار

گوه نیر اوز وارینا قوربان اولوم وار الینه

اهل حال اولسا بیلر ، موسیقی نین قیمتینی

حرمتین ساخلار اگر دوشسه خریدار الینه

زخمه لر غم داغیدیر آفرین اولسون ائلیمین

شعرینه ، صنعتینه ، جمله صنعتکار الینه

عشق دیوانه سی نین همدمی دیر موسیقی میز

تارا ، نا محرمی قویما ، آلا زینهار الینه

بو ائلین اوز هنری اوز سازی اوز عادتی وار

وئرمه یین سیز بئله گنجینه نی اغیار الینه

سوزو سوز اهلینه توشور سازی وئر ساز چالانا

ائلین ، ائلدارلیقینی ، وئربیزیم (ائلدار) الینه



تاريخ : هفتم شهریور 1393 | 17:20 | نویسنده : مهدی همت زاده(ائلدار) | [ ]
اویره تمن لرگونو مبارک اولسون 

                       معلم

 

هله ده ذهنمین یادداشلارین دا

                    شیرین خاطره لر آراسینداسان

هله ده دنیاما افق دان باخان

                  شافاق اولدوزونون سیراسینداسان

سودالی کونلومون درین لیگینده

                   ایزسالیب یاشاییر یاشادیر منی

هر زامان هر یئرده اوز صحبتیمده

                   یادیما سالمیشام ، اونوتمام سنی

درین محبتین بیر اجاق کیمی

                  قیشی می باهارا یایا دونده ریب

قارانلیق گئجه ده بیر کلمه سوزون

                  اوزومو گونشه آیا دونده ریب

حیات دگیشسه ده یئر کوره سینده

              سن یاشیاجاقسان اولومسوزسن سن

گئچمیش لر سایاقی گله جکده ده

                بیر سن قالاجاقسان بیرده کی وطن

اول ده آنامین لای لای سسینه

                   کورپه کن آچیلسا صحبته دیلیم

(ائلدارین ) بیر داها آچدین دیلینی

                    اوخویوب یازماقا ای معلمیم

                                   مهدی همت زاده (ائلدار)   


برچسب‌ها: به مناسبت هفته بزرگداشت مقام معلم

تاريخ : ششم اردیبهشت 1393 | 0:31 | نویسنده : مهدی همت زاده(ائلدار) | [ ]

  سن سیز

گونلر گئچیر ای شوخ عجب نافیله سن سیز

بوندان بئله ظنَ ائتمه کی کونلوم گوله سن سیز

هر جوریوه دوزدوم ، بودوزوم دایره سینده

دوشدوم ائل ایچینده گئنه دیلدن دیله سن سیز

دنیاده حیاتین منه یورقونلوقو قالدی

هر لحظه برابردیر اینان بیر ایله سن سیز

آه ائتمه دیگیم بیر گونوم اولمور ،اوسبب دن

بوغمده گوزوم یاشی دونوبدور سئله سن سیز 

همدم دی منه خاطره لر بیرده سه تاریم

هردن توکورم دردیمی تئلدن تئله سن سیز

بو عصر ده مجنونه سایاق گونلریم اولدو

مجنون کیمی دوشدوم گئنه چولدن چوله سن سیز

بوش وعده لره ساده لیگیمدن من ایناندیم

قالدیم بو معمَاده عجب موشکوله سن سیز

من ایندی ده اوز عهدیمه پیمانیمه بندم

سندن صورا میل ائتمه میشم بیر گوله سن سیز

بیر عمردو حسرت یوکو آلتیندا یورولدوم

یاندیم غم هجرانیوه دوندوم کوله سن سیز

دنیانی دئمیشلر کی مکافات عمل دی

بیر گون گئچرالبته قالان قافیله سن سیز

(ائلداری) سالیب دردسره درد فراقین

           افسوس گئچن گونلری دوشمور اله سن سیز                                      18/1/1393 مهدی همت زاده (ائلدار) - ماکو



تاريخ : هجدهم فروردین 1393 | 19:11 | نویسنده : مهدی همت زاده(ائلدار) | [ ]
                                          تضمین        

  نازنین باشدا اولا نازین اتک دن سوزوری      سوز لبیندن دئیه سن بالدی پتک دن سوزوری                                                                                             «انزاب»   

دلبرین عشق تمنّاسی ، دیلک دن سوزولور

یئل قاتان زولفو داغیلدیقجا لچک دن سوزولور

زروزیوردی سوزو سنگ محک دن سوزولور

«نازنین باشدا اولان نازین اتک دن سوزولور »

«سوز لبیندن دئیه سن بالدی پتک دن سوزولور» ...................................................

یایلیقی باشدان آچان یئرده اولایدیم قوناغین

اوخویایدیم سنه من اوردا ، محبّت وراغین

حسرتیم قالماز اگر بیرده گورم گنج چاغین

«ساچینی یئل داغیداندا گورونور گل یاناغین»

سانکی آی هاله تک نور فلک دن سوزولور» ................................................

من اوره ک باغلامیشام آذربایجان ائلینه

شاُنینه شهرتینه سئومه لی شیرین دیلینه

سوزولن سورمه لی گوزلر یاراشیق دیرگلینه

«نازیلان سن نه زمان شانه چکنده تئلینه »

کونلومون ناله سی اول اینجه بیلک دن سوزولور» ................................................

حسنی حیرت ده قویوب دهرده شمس و قمری

یاراشیر قامتینه بئل ده گوموش دن کمری

او باخیشلان گنه بو کونلومه ووردون شرری

«اوتانارکن اوتوران دا اوزونه شرم تری »

«گوز دئییر بسکی نارین دردی الک دن سوزولور» ...................................................

قار یاغاندا یاغار اوّل اوجا داغلار باشینا

دن دوشوپدورگورورم ساچلارا کیپریک قاشینا

اویوب آلدانما دئدیم سن بو یولون یولداشینا

«غصه دن گوزلرین اول دم کی دولور گوز یاشینا»

کیپریگین دن دیه سن اینجی ایپک دن سوزولور » ................................................     

گئجه نی صبحه کیمی گوزلری میز قالدی اویاخ

یاشادیق گونلری گئچمیش ده سراسر بو سایاخ

سحر آخشام سیز اولانماز ، گئجه دی صبحه دایاخ

«عاشقین مهرینی گور طاقت معشوقیه باخ »

«شمع یاندیقجا سیزیلتی کپنک دن سوزولور » ..............................................

نه اولار دوز اولاسان عهدیله پیمانین دا

منی مهمان ائده سن بیر گئجه لیک یانیندا

داغیلا غصّه لریم زلف پریشانین دا

«شمع تک من یانیرام آتش هجرانین دا »

قطره قطره جانیمین یاغی اوره کدن سوزولور » ............................................

اوزونه باخماقیلان تر یاناقین دا دوزولر

ساللانار قاش قاباقی غنچه دوداقلار بوزولر

(ائلدارین) حسرتی آرتار الی یاردان اوزولر

«گورموشوق چوخ یورولان خسته دوشن گوز سوزولر»

«انزابین گوزلری ده شعر دئمک دن سوزولور » ..................................................

                                                             مهدی همت زاده (ائلدارماکو)  



تاريخ : نهم فروردین 1393 | 16:9 | نویسنده : مهدی همت زاده(ائلدار) | [ ]
                     اي يار

  ياز گلدي گؤزل يوردوما داغلاردا ارير قار

بايرام نفسي ائتدي ياتان غنچه‏ ني بيدار

 بولبوللر اوخور تازه‏ لنير وعده‏ ي ديدار

باخ گؤر نه گؤزل پرده چكيب كؤوشنه گولزار

 گؤيلرده گزركن اولورام يئرده گرفتار

بير گوللو باهاردا سني من سئوميشم اي يار

---------------------------------------------

 بیر عمر سنين حسرت هجرانيوه دؤزدوم

سينديرديغين اوْل عهد ايله پيمانيوه دؤزدوم

 بيهوده يئره بير قورو عنوانيوه دؤزدوم

حوسنون ساياراق عيبيوه نقصانيوه دؤزدوم

 اولدوم گئنه هر جؤوريوه شوق ايله خريدار

بير گوللو باهاردا سني من سئوميشم اي يار

 ------------------------------------------

 عاشق اولانين بلكه حياتي هدر ايميش

سئودا چكنين هر گونو محنت كدر ايميش

 مجنون او سببدن بير عؤمور دربه‏ در ايميش

شايد بو دا تقدير قضا و قدر ايميش

 گولشنده آچان گوللره همدم يارانيب خار

بير گوللو باهاردا سني من سئوميشم اي يار

 --------------------------------------------

 كوسمك گؤزليم سن كيمي جانانه ياراشماز

غم شانه‏ سي، گيسوي پريشانه ياراشماز

 تدبير خطا، يوسف كنعانه ياراشماز

باور ائله، هر كنج لبه، دانه ياراشماز

 ايسترسن اينانما سؤزومه، ائتگيلن انكار

بير گوللو باهاردا سني من سئوميشم اي يار

 -------------------------------------------

 كون ايله مكاني يارادان خاليق عالم

كامل ياراديب سنده كمالاتي مسلّم

 تدبير سنيندير هله ده اؤل دئسن اؤللم

انصاف ائله باري بو قدر ائيله ‏مه چم-خم

 ال چك بو ادادن گؤزليم، اولما دل‏ آزار

بير گوللو باهاردا سني من سئوميشم اي يار

 -------------------------------------------

 گر اولمايا عشقين آدينا دهرده بير زاد

نه مجنون اولاردي نده شيرين‏ ايله فرهاد

 گل ائيله‏ گيلن محبس غمدن مني آزاد

عارفسن اگر ايسته‏ مه اغياردن امداد

 اغيار اولا بيلمز بئله بير عشقه سزاوار

بير گوللو باهاردا سني من سئوميشم اي يار

 -----------------------------------------------

 بيچاره كؤنول صبر ائله چوخ اولما گئيلئي لي

عشق اولماسا بولبوللرين اولماز گوله مئيلي

 افسانه ده اولسا هله ده ليلي‏ دي، ليلي

سالدي هوس عشقه بيزيم (ائلداري) خيلي

 بو سنده اولان ناز، ادا ايله بو رفتار

بير گوللو باهاردا سني من سئوميشم اي يار

-----------------------------------------------

مهدی همت زاده (ائلدار) - ماکو



تاريخ : بیست و نهم اسفند 1392 | 22:42 | نویسنده : مهدی همت زاده(ائلدار) | [ ]

                            داغلار

   باهار بایرامیندا یاز آی لاریندا                 چوخ اولار چوللرده قوناغین داغلار

    آچاندا لاله لر ساری قیرمیزی                 قیزارار هر زامان یاناغین داغلار

     گویده کی بولوتلار جولان ائدنده              سولار جیغیر سالیب آرخا گئدنده

     گورکمین کونلومو سالدی کمنده             هه له ده آغاریر پاپاغین داغلار

      دوشونده ایز سالیب آینا بولاغلار             دینجه لیر قوینوندا آلما یاناغلار

      آسلانار قندیلدن گوموش چیراغلار           سوننده گویده کی چیراغین داغلار

       یایی لیر هر یانا کهلیگین سسی                  تئل لرین ده گزیر یئلین نفسی 

      آرتیریر انسان دا عشقی هوسی               بیر بیر اوخوندوقجا وراغین داغلار

      مله سین قوزولار گون اورتا چاغی          بول اولسون ائل لرین کره سی یاغی 

       مارال لار مکانی طرلان اویناغی           اوچولار توتسونلار سوراغین داغلار

      اوبالار یورتلاردا قورولان زامان              چادر بیر بیرینه سویکه نیر یامان 

       اته گین ده سنبل باشین دا دومان         بولوت لار قوینون دا یاتاغین داغلار 

       خیالین ده نیزی آشیب داشان دا          سوگی سوگی سیله حلال لاشان دا 

      عاشیقلر وصفینده نغمه قوشان دا         ائشیدیب سس لنسین قولاغین داغلار 

      قار بوران قددیوی اگه بیلمه دی              بلکه ده  خطریوه دگه  بیلمه دی  

     (ائلدار) نیسکیل لری دییه بیلمه دی         ایسته دی چاغ اولسون داماغین داغلار



تاريخ : چهاردهم اسفند 1392 | 23:55 | نویسنده : مهدی همت زاده(ائلدار) | [ ]

                                                من قالدیم

گئنه ویرانه کٌنجین ده سه تاریم قالدی من قالدیم

کتابیم ، دفتریم ، شعریم، شعاریم قالدی من قالدیم

 نه یار قالدی نه بیر یولداش نه گوز یاشیم سیلن بیرکس

تحسّرله گئچن لیل و نهاریم قالدی من قالدیم

جوانلیق دا اوشاقلیق تک اَسَن بیر یئل کیمی گئچدی

آغارمیش ساچلاریم سولموش عذاریم قالدی من قالدیم

خزان قهریله سولموش بیرگولم کیم قالمییب چاره م

سارالمیش گلشنیم باغیم بهاریم قالدی من قالدیم

منیم یاتمیش قارا بختیم منه یار اولمادی بیر گون

گئجه تا صبح اولونجا آه و زاریم قالدی ، من قالدیم

بیر عشق اوغروندا من گئچدیم غروروم اعتباریم دان

سنیق کونلوم پوزولموش اعتباریم قالدی ، من قالدیم

بلاکش (ائلدارام ) آنجاق، بلاچکدیم بو عالمده   

اوره ک قانیله دولموش روزگاریم قالدی من قالدیم



تاريخ : سوم اسفند 1392 | 0:12 | نویسنده : مهدی همت زاده(ائلدار) | [ ]
                            آخشاملار


ائله کی آی بولودا دالدالانیر آخشاملار

عشق پیمانه سی الدن،جالانیر آخشاملار

هرقارانلیق گئجه نین یاددا قالان لحظه لری

بیر اوموتلو سحره ،آرخالانیر آخشاملار

خیالین چرچیوه سینده یارانیر خاطیره لر

نه سبب دیر گؤره سن تاپدالانیر آخشاملار

آچیرام گوشه ی خلوتده کؤنول دفترینی

داغ کیمی سینه مه غملر قالانیر آخشاملار

دوزورم صبح آچیلاندان گونشین باتماسینا

خیالیم یار هاواسیندا دولانیر، آخشاملار

سنی اغیارایله بیرلیکده دوشوندو کجه منیم

اوره گیم قانه دونور پارچالانیر آخشاملار

قارا تئللرده کی یارین اوزونه کؤلگه سالیر

(ائلدارین) وار یوخو بیردن تالانیرآخشاملار

                                                                             مهدی همت زاده (ائلدار)



تاريخ : بیست و چهارم بهمن 1392 | 16:58 | نویسنده : مهدی همت زاده(ائلدار) | [ ]


                   گئجه لر

نولی کیم سئوگیلی جانانیم اولایدین گئجه لر

اینانیب عشقیمه ،مهمانیم اولایدین گئجه لر  

دولاناردیم باشیوا، هر گئجه ،پروانه کیمی 

گر منیم شمع شبستانیم اولایدین گئجه لر   

دنیانین بخته ور انسانی سایاردیم اوزومو

سن اگر راحت دورانیم اولایدین گئجه لر  

شوق دیداریله هر گون، اویاناردیم یوخودان

گوزلیم ، گر مه تابانیم اولایدین ،گئجه لر  

عومرومون قیمتی آرتاردی قوجالمازدیم ،اگر

جسم زاریمده منیم، جانیم اولایدین گئجه لر

بیرعوموردور دوزورم حسرت هجرانیوه من  

چاره سیز دردیمه درمانیم اولایدین گئجه لر

(ائلدارام)، درد فراق اوسته ،یازارکن غزلی

ائشیدیب ناله می ، لقمانیم اولایدین گئجه لر



تاريخ : بیست و چهارم بهمن 1392 | 16:53 | نویسنده : مهدی همت زاده(ائلدار) | [ ]

                           قیرمیزی گونش 

             

          بولوددان چیخار  /  گویده فیرنیخار

                     ظلمتی ییخار  /  قیرمیزی گونش 


 دوغودان قالخار /  باتی دا باتار 

      سانماکی یاتار  /  قیرمیزی گونش

               

                    زولفونو آچار / داغیدار اوزه 

                         نورساچار بیزه  /  قیرمیزی گونش


     بیزاویانمامیش   /  یوخودان دورار

          چارداغین قورار / قیرمیزی گونش

             

                   داغلارین قاری  /   اری دی گنه

                          آفرین سنه    /  قیرمیزی گونش                                                                                   مهدی همت زاده (ائلدار) - ماکو                                


برچسب‌ها: اوشاق شعری

تاريخ : بیست و دوم دی 1392 | 19:44 | نویسنده : مهدی همت زاده(ائلدار) | [ ]


چیلله گلیر

 

شاعر گوتوروبدو قلم دفتری     

 عادتلردن یازیر ائللردن یازیر

خیالیندان گئچیر اسگی گونلری  

 خاطیره دولوسو ایللردن یازیر

سوبانی یاندیریب سویوق اتاقدا   

 باشقا بیر عالمده گزیر دولانیر

سماور قیینه ییر چایلار قاباقدا    

 گاهدان باتیر غمه کونلو بولانیر

سویوقدا قیریشیب آچیلیر هردن   

 قوروموش الهامی یئنی دن جوشور

دانیشیر سیزلره قافیه لردن        

 ماهنی لار یارادیر قوشمالار قوشور

خیالدا کوکلیور صدفلی سازی     

 اوخشاییر تئلینی گتیریر دیله

یاردا کی قامتی یارداکی نازی     

 اوخشادیر سنبله بنزه دیر گله

هردن بیر اوستونه غم قوشون چکیر  

 تالییر مولکونون سارای لارینی

آیدین گونلرینه قارانلیق چوکور      

سوسدورور قلبی نین هارایلارینی

چیلله دی پاییزین صونو دو صونو  

دومانلی گونلری یادینا دوشور

طبیعت دگیشیر او ساری دونو     

 یاپراغی توکولن آغاجدا اوشور

چیلله نین گئجه سی گلدی یتیشدی 

 قار بوران گله جک شاختا گله جک

خیالی اوخ کیمی قلبیمی دئشدی   

 کیملرآغلیاجاق کیملر گوله جک

نه کورسوموزقالدی نه تندیراجاق

 قیش گئنه سویوغو تحفه گتیریر

قاپینی دویه جک داما قوناجاق    

 یولدادی قار بوران گلیب یتیریر

باشلانیب میللتین آلیش وئریشی   

 کیمی سی قاییدیر قوجاقی دولو

قوهومون قونشونون اوپوش گوروشو

 چیخاردیب یادلاردان یتیمی قولو

بیر عده پوللودو گوردگون آلیر   

پسته دن بادامنان آلمادان ناردان

بیرعده یوخسولدا حسرتده قالیر  

 اهل عیال یانیندا قیزاریر عاردان

یوخسولون واریدی بیر دام کلفتی 

 دردسری چوخدو باشی آشاقی

وارلی نین یئمیشی چره زی اتی  

 نه اوزو غم چکیر نه ده اوشاقی

 اوزون بیر گئجه دی چیلله آخشامی

 قارداشلار یغیشین کورسونو قوراق

یاندیراق تندیری قیزدیراق دامی    

 گئچمیشلر سایاقی دوراق اوتوراق

دئمیک بیزه نه یوخسول اوتوشر  

 قورویاق دبلری قدیم کی سایاق

عادتلر دگیشسه ارزش دن دوشر  

 ندن اوزوموزدن تازا دب قویاق

کیمسیه قالماییب دنیانین مالی     

دنیادی هر گلن بیر گون گئده جک

گورمه سک دوره نی قاباقی دالی 

 بابالار بیزلردن نفرت ائده جک

دور گئده ک آتالار یاشیان کنده   

اوچ تونقال قالیاق یغیشاق اوردا

او گوزل دبلری ائلیه ک زنده   

 ائله آرخالاناق چتینده زوردا

شنلیک سسی گلسین بیزیم ائللردن 

 پایلیاق شادلیقی داغیداق غمی

ناغیللار دئیلسین قارا دئولردن  

آخماسین کیمسه نین گوزونون نمی  

گئچمیشی بیر کره گوزدن آتمیاق

 سیلمیه ک خاطیردن گئچمیشی میزی

انسانلیقی میزی پولا ساتمیاق    

 قویمیاق اوزگه لر آییرسین بیزی

شادلیقدا بیر اولاق غمده بیر اولاق  

 بیر گوزده آغلیاق بیر اوزده گوله ک

بیر یئرده آچیلاق بیر یئرده سولاق  

 قوهومون قونشونون دردینی بیله ک

دووارین بیر اوزو شنلیک اولسادا  

 بیر اوزو حسرت دی بیر اوزو کدر

(ائلدار) ین اوره گی هردن دولسادا 

 دئییلن سوزلرین سانمایین هدر 



تاريخ : بیست و دوم آذر 1392 | 17:25 | نویسنده : مهدی همت زاده(ائلدار) | [ ]

قار

 

نه یاغیرسان حزین حزین آغارمیان ساچلاریما

شیغاییرسان دال با دالا کیپریگیمه قاشلاریما

گونوم چیخار توشلویارسان منیم ده قارغیشلاریما

یاغیرسان یاغ ،اسیرسن اس ،هله دوران سنین کی دی

آسیرسان آس ،کسیرسن کس ،هله دوران سنین کی دی

.....................................................

نه بیلیرسن بو حایات دا تاپدالانیب ازیلن وار

سوروم سوروم سورونن وار آرالیقدا بوزولن وار

ئولن کیمدی قالان کیمدی الی یاردان اوزولن وار

سپه لیرسن ساغا سولا ایتیریرسن ایزی میزی

بو سویوقدا سیلله وروب قیزاردیرسان اوزوموزو

.....................................................

او گوندن کی آغ دونویون گئیدیریب سن بیزیم یوردا

اوندان بری فرصت دوشوب چولده گزن قوجا قوردا

قاچان قاچیر قالان قالیر دالدالانیر اوردا بوردا

صبیر، طاقت ، قالمییب دی منده اوزه دایانمیشام

بیر عوموردو مین بیر درده دوزه دوزه دایانمیشام

.......................................................

داغ دوشونده ده لی جیران آیاقلانیب قاچا بیلمیر

کورپه قوزو قوجا قویون قیریشیغین آچا بیلمیر

سیلدیریملی قایالاردان قوجا قارتال اوچا بیلمیر

ائله سی واردی خسته دی ائله سی وار یارالی دی

بو سویوقا دوزه بیلمیر یوواسیندان آرالی دی

...................................................

نفس سالیب دونداریرسان بولاغلارین گوزه سینی

گیزله دیرسن ایچه ریده قیز گلینین کوزه سینی

قوجالارا گوستریرسن سویوقویون مزه سینی

قاپی لارا قفیل ووروب ایچه ریدن باغلیرسان

یوخسوللارا داغ چکیرسن اوره کلری داغلیرسان

...................................................

یاخامیزی تانیالی بیزی دارا قیصدیریب سان

او هیبتلی های کوی سالان آخار چایی سوسدوروب سان

قیزیل تئللی گونشی ده هله بیزدن کوسدوروب سن

یورقون یورقون باخان آی دا آچا بیلمیر هاله سینی

یئل اسدیکجه ائشیدیرم طبیعتین ناله سینی

.................................................

اتکلرده چن دومانین اوزانیب دی هاردان هارا

کولک قالخیرکوپباسینی سالیر گئنه دام دووارا

من ده باش آلمیش گئدیرم هله قاری یارا یارا

هی دئییره م اوز اوزومه قارا گونون عومرو آزدی

نه قده ر یاغاجاق یاغسین قشین صونو گئنه یازدی

................................................

قاباقدادی یاز گلنده اوندا قاتاجاق باشیین

آخیداجاق تپه لردن دره لره گوز یاشیین

گونش اوندا توکه جکدی هر طرفه ایچ داشیین

یادیوا سال اوندادی کی ائل دوداقی گوله جکدی

اوجا داغلار اته گینده گول دوداقی گوله جکدی

...............................................


 

 دنیا بئله قالان دئییل یاز گله جک یای گله جک

طبیعته گلین کیمی گول چیچکدن پای گله جک

اینانمیرسان بئش اون گونو تر تله سیک سای ، گله جک

حسرتیله گوزله ییرم گوز یول دادی قولاق سس ده

قسمت اولسا گورمه لی ییک دورنالاری دسته دسته

...................................................

قار اولکه ده  برکتدی اومود  وئریر  یازا ، یایا

اوجا داغلار یاتاغیندان آخیر گئدیر قورو  چایا

            بئله لیکله  اکینچی نین زحمت پایی گئتمیر زایا

(ائلدارین دا) اوزو  گولور بئله ثروت وار الیندن

طبیعته  حیات وئرن  بو شاختالی  قار  الیندن

.....................................................

 




تاريخ : چهاردهم آذر 1392 | 20:42 | نویسنده : مهدی همت زاده(ائلدار) | [ ]

اول زمان کی عشقیمیزدن یاد ائدردین ائتمه دین

قانه دونموش کونلوموسن شاد ائدردین ائتمه دین

قالمیشام کنج قفس ده چاره سیز قوشلارکیمی

بیله بیر گون ده منه امداد ائدردین ائتمه دین

عشق زنجیرین ده بندم کیم خلاص ائتسین منی ؟

ایسته سیدین سن اوزون آزاد ائدردین ائتمه دین

قلبیمی بیر شیشه تک قهریله سیندیردین گولوم

بیر تبسّوم له اونو آباد ائدردین ائتمه دین

خط خالین عارضین افسون ائدن دیر عالمی

گوزلرین له معجزه ایجاد ائدردین ائتمه دین

بدر کامل سن چیخیپسان آی کیمی سن قارشیما

بیر گونش تک کونلومو ارشاد ائدردین ائتمه دین

آستانین دان قوولموش عاشیقی بیچاره نی

گوزلرین سوزدورمَگه معتاد ائدردین ائتمه دین

(ائلدارین ) فیکرینده حکّ اولموش شیرین افسانه سن

                     سن ده شیرین تک اونو فرهاد ائدردین ائتمه دین
برچسب‌ها: شعر, ائتمه دین

تاريخ : سیزدهم آبان 1392 | 22:39 | نویسنده : مهدی همت زاده(ائلدار) | [ ]

       ائتسن
بیر گون گوزلیم ، کوی وفادن گذر ائتسن

حسرت ده یانان عاشقیوی بختوَر ائتسن

سئودا چَکه نین دردینی درک ائتمَگه خاطیر

اولدوزلاریلان بیر گئجه شامی سحر ائتسن

من غم یوکونو باغلارام اغیارین الیندن

سن درده گرفتار ائله مکدن حذر ائتسن

آنجاق کی غروب ائتمیه جک منده اومودلار

سالسان یادا اوز یارینی شقّ القمر ائتسن

بسلر سنی قوینوندا بو یوردوم آنالار تک

توپراقینی گرشوقیله کحل البصر ائتسن

جنت دی دئسم سوزلریمی غربته سالما

باشین اوجالار باشدا اونو تاج سر ائتسن

داش توپراقینی لعل دن افضل گوره جکسن

بیر لحظه کونول پنجره سیندن نظر ائتسن

(ائلدار) اونودولماز گوزلیم ائللر ایچینده

گر سن اونا جور ائتمَگیوی مختصر ائتسن



تاريخ : چهارم آبان 1392 | 22:7 | نویسنده : مهدی همت زاده(ائلدار) | [ ]

 بو گئجه 

آییغام ،خاطیره لر خاطیرینه 

یوخو بیگانه دی مندن بوگئجه 

گوزلورم بلکه بوگون آی گورونه 

آی کوسوبدور ندی مندن بوگئجه 

بونه افسانه دی مندن بوگئجه 

-------------------------------

نه سکوت ایچره یاتیپ دیر دره لر 

نه قارانلیق دی بوگون پنجره لر 

بو پریشان لیقا شن خاطیره لر 

غملی بیر شانه دی مندن بوگئجه 

بونه افسانه دی مندن بوگئجه 

---------------------------------

گورن افسون ائله ین کیمدی بیزی 

پوزدو گئچمیشده قالان هربیر ایزی

گئجه نین ذکری ، خیالین دنیزی

ده لی دیوانه دی مندن بوگئجه

بونه افسانه دی مندن بوگئجه

---------------------------------

مات قالان کلمه دی سوزدو هجه دی

(ائلدارا ) هر گئجه بیر بیلمه جه دی

خیالین دی ، قاراگوندو ، گئجه دی

اوچو، یان یانه دی مندن بوگئجه

بو نه افسانه دی مندن بوگئجه

-----------------------------------



تاريخ : بیست و هشتم مهر 1392 | 21:24 | نویسنده : مهدی همت زاده(ائلدار) | [ ]

                                ( نه اوخویوم سیزلره )   

            اوره کلرین بوزا دونموش چاغیندا                                                  سارماشیق تک ساریلمیشام دیزلره 

           گزمک اولمور محبتین باغیندا                                                       نفرت توزو سپه لنمیش اوزلره 

          الی بوشام نه اوخویوم سیزلره  

                                         ****

          باش قاریشیب بودنیانین مالینا                                                      بو گئدیش له کیمسه باخمیر دالینا 

          ای وای اولسون انسانلارین حالینا                                                 ایره تی لر دوداخ بوزور بیزلره 

          الی بوشام نه اوخویوم سیزلره 

                                     **** 

          یولداش دئسه یولداشینا سوزونو                                                   ناحاق یئره درده سالیر اوزونو 

         قان توتوبدو انسانلیقین گوزونو                                                        ایزایتیبدی قاریشیب دی ایزلره  

          الی بوشام نه اوخویوم سیزلره 

                                    **** 

      بیریئرده کی یاددان چیخدی یارادان                                                 وجدان سسی گله بیلمز اورادان 

       گوتورولسه حیا حرمت آرادان                                                       قدیر قیمت وئره ن اولماز سوزلره 

       الی بوشام نه اوخویوم سیزلره 

                             ****

     دوزلوگ اوخو داشا ده ین زاماندی

     نامرد الی مردی اه ین زاماندی 

    ائل دردینی (ائلدار) دئین زاماندی 

        دوغمالاردا یاد اولوبدو بیزلره 

                            الی بوشام نه اوخویوم سیزلره    



تاريخ : بیست و یکم مهر 1392 | 17:50 | نویسنده : مهدی همت زاده(ائلدار) | [ ]